Leraar: Ds. Lou-Maré Denton

Lou-Maré het by die gemeente aangesluit in 2009.

2003 : Klaar geswot by Stellenbosch (US)
2004 - 2005 : Jeugwerker NGK Cradock-Oos
2006 : Hulpleraar NGK Vredenburg Akkerdyk
2007 - 2008 : Leraar met opdrag Jeug NGK Pietersburg Oos

Lou-Maré sê: "Ek het in Saldanha grootgeword & skoolgegaan (Laerskool Saldanha & Hoërskool Vredenburg), daarna op Stellenbosch gaan swot.

Ek is mal oor fliek, lees (veral fantasie,avontuur en speurverhale), kuier, kuier, kuier, en volg sekere TV reekse. My gunsteling is Grey's anatomy en CSI.

'n Goeie boek en/of fliek wat my daardie A-HA oomblik gee energize my ongelooflik baie, asook stimulerende uitdagende gesprekke met mense wat kreatief en anders dink.

Mense energize my oor die algemeen, veral jongmense, hulle energie is aansteeklik en dit is 'n besonderse ervaring om te sien hoe hulle ontwikkel en 'n voorreg as hulle jou toelaat om saam met hulle te journey. Dit is ook nogals hoe ek die bediening sien. Ons is almal besig met 'n reis ('n journey) en vir 'n gedeelte van die reis, is ons saam op reis en dit is nie soseer die eindpunt wat tel nie, maar die journey self. En wat ons kan inbou in mekaar se journeys."

Leraar: Ds. Johan Mocke

Johan het by die gemeente aangesluit in 1994.

- Johan is gebore op 29 September 1959 te Vryburg.
- Tot op ouderdom 11 grootgeword op Kenhardt.
- Vanaf standerd 4 tot middel standerd 9 op Upington.
- Daarna is ons Kaap toe (Parow). Gematrikuleer in HTS Bellville in 1977.
- Op die trein gegooi na Bloemfontein, 1SDB vir 3 jaar militêre opleiding by die Pantserkorps en Pantserskool.(Ek kon 'n "parrabat" met 'n toggletou oor die kopslaan, maar weens mysagmoedige geaardheid het ek toe nie!)

Teologiese opleiding vanaf 1981 tot 1987. Ook Sielkunde Hons in die tyd opgedoen, my vrou Elaine ontmoet, en medeverantwoordelik dat Christiaan (ons eerste) die lig sien - als binne die huwelik.

1988 - 1994: Ons eerste gemeente te Nieuwoudtville - ses wonderlike vormende jare (en nog 2 seuns - Corne en Evan - by!) en ook my Mth studies buitemuurs voltooi.

Sedert April 1994 in Brackenfell - steeds besig om elke dag God se algrootheid nuut te ontdek en met medegelowiges te deel. En saam met kollegas (waarvan sommige gekom en gegaan het) en lidmate (wat ook kom en gaan!) die reis van die geloof en lewe te loop.

Wat gee my energie?
Nuwe dinge, oor God, avonture - om op nuwe plekke te kom, op reis te gaan, iets in 'n boek te ontdek, 'n foto te neem, deur 'n verkyker te kyk, te skype, te google, grondpaaie met 'n motorfiets te ry, my kinders te sien groei, my vrou te sien mooier word, en om te beleef dat iemand met wie my pad kruis, se lewe transformeer tot nuwe troos, nuwe insig, nuwe vrede nuwe sekerheid in die Here - en dat ek daarin kon deel. Elke week nuwe waarhede in die Bybel te ontdek en dit op 'n Sondag te kan deel - wat 'n voorreg. Nuwe insigte vir ons gemeente, nuwe deurbrake oor ou grense en die vreugde van mense wat in die Here hul vreugde vind.

Aflosprediker: Dr. Johan Spies

HESTER		JOHAN
GEBORE	Gebore as Hester Troskie op 11 Augustus 1946 te Vredefort	Gebore: Cradock.
VROEë JARE	Skoolopleiding op Kroonstad tot matriek. Een jaar verpleeg in Karl Bremer Hospitaal. 3 jaar BSc-graad op Maties. 1 jaar onderwysdiploma op KOVSIES. 3en3/4 jaar skoolgehou op Ventersburg.	Begin skoolgaan in 'n plaasskool met 12 leerlinge van Sub A tot St. 5. St. 4 en 5 in Laerskool Swartland, Malmesbury. St. 6 en 7 in Hoërskool Riviersonderend. St.8 - 10 in Hoërskool Oudsthoorn. Werk in Gevangenisdiens 1969 - 1973 terwyl ek studeer (vanaf 1970).  Tydens my studiejare het ek nagdiens gewerk by Victor Verstergevangenis.
ONTMOET	In 1974 was ons lede van die Jeug-tot-Jeug-Aksie van die NG Kerk waar ons mekaar ontmoet het.  In 1975 is ons getroud.
LEWE SAAM	J:  1975 - 1978: Teologiese Kweekskool, Stellenbosch. H:  Goewernante by Vergelegen in Somerset Wes, Verpleeg in Stellenbosch Hospitaal, los hier en daar af as onderwyser, kry kindertjies en maak hulle groot terwyl Johan swot. J:  1979 - 1982: Leraar van NG Kerk Ysterplaat. H:  Predikantsvrou by Ysterplaat, los hier-en-daar af as onderwyser tot 1983. J:  1982 - 2000: Leraar van NG Kerk Pietermaritzburg-Suid.  Diens beëindig omdat die gemeente nie langer die leraar kon bekostig nie. H:  Predikantsvrou in Pietermaritzburg-Suid en later ook voltyds onderwyser. H:  2000 verhuis na die Kaap. J:  2000: Los af in Franschoek en doen konsultasiewerk in Laingsburg. J:  2001 - 2010: Werk by Informasietegnologie, Universiteit Stellenbosch. H:  2001 voltyds onderwyser by Stellenberg Hoërskool. J:  Werk tans by Sentrum vir Navorsing oor Wetenskap, Evaluasie en Tegnologie (SENWET) aan die Universiteit van Stellenbosch. H:  2011 tree af as pensioenaris en word lidmaat by Brackenfell-gemeente. 2012 soek nog my voete tussen baie moontlike rolle wat ek kan vervul. Hester:  God het my die belangrike opdrag gegee om vrou vir my man, ma vir my kinders, predikantsvrou in gemeentes en onderwyser in skole te wees. Nou gee Hy my die belangrike opdrag om pensioenaris te wees en hopelik binnekort ook ouma.  Ek soek nog Sy lig. Johan:  Stokperdjies: fotografie en musiek.  Sport: Ry bergfiets en stap.
WAT GEE MY ENERGIE	Om met my gesin speletjies te speel en te kuier, om met my rugsak 'n berg op of die veld in te stap, om in die son te lê en mediteer, om tennis te speel, om kinders Skeinat te leer en hulle te probeer gids deur die lewe, om historiese romans te lees, om in 'n kleingroep gereeld Bybelstudie te doen, om te sien hoe God in ander mense se lewens werk, om koor te sing, om klassieke musiekopvoerings by te woon asook opera's.	Mooi musiek, eredienste waar ek God se teenwoordigheid beleef, gelukkige verhoudinge, die pragtige kinders wat die Here ons gegee het, skeppende oplossings vir probleme, opwindende rugby, tennis en krieketwedstryde op TV.

Teologiesestudent: Elzanne Mostert

2006:   Skoolloopbaan voltooi aan Hoërskool Brackenfell.
2010:   Voltooi B. Th. graad aan die Universiteit van Stellenbosch.
2011:   Voltooi M. Div. graad aan die Universiteit van Stellenbosch.
2012:   Besig met Lisensiaat-jaar aan die Universiteit van Stellenbosch en doen die praktiese been van dié jaar in die gemeente.
Ek is ‘n Kapenaar deur en deur – Stormer, WP- en Matie-ondersteuner!  Ek is lief vir my stad met sy pragtige berg en yskoue see asook vir die dorp wat my gevorm het.  Ek is daarom opgewonde om op so ‘n besonderse wyse deel te wees van hierdie dorp, en spesifiek ook hierdie gemeente, in die jaar wat kom.
Ek is lief vir diere (spesifiek honde!).  Ek kan myself verloor in ‘n goeie storie, hetsy ek dit vind in ‘n boek, ‘n televisiereeks, ‘n film of ‘n toneel.  Alhoewel ek nie vreeslik sportief is nie, geniet ek wel ‘n goeie hokkie-game of ‘n lang stap op die strand.
Om met mense te gesels oor teologie en hoe hulle dink daaroor, is vir my ‘n verrykende ervaring.  Ek word elke dag aangenaam verras met nuwe ontdekkings en nuwe maniere van dink oor God.  Ek glo dat ons almal ‘n rol speel in mekaar se lewens en dat ons groei en gevorm word deur oop en eerlike gesprekke met mekaar.  Dit is my droom dat die kerk ‘n plek sal wees waar hierdie gesprekke plaasvind, waar ons leer bymekaar en waar ons ‘n veilige ruimte kan vind om te wees wie ons werklik is.